SAMBRAMA WACANA

SAMBRAMA WACANA

PERPISAHAN SISYA KELAS XII

Suksma aturayang tiang majeng ring pengenter baos antuk galah sane ketiba ring sikian titiang.

Sane singgihang titiang, Ketua Komite SMA Negeri 1 Tabanan,

Sane wangiang titiang, Kepala SMA Negeri 1 Tabanan, Wakasek, Bapak/Ibu Guru, Staf Tata Usaha, Pustakawan-Pustakawati SMA Negeri 1 Tabanan lan sawitran-sawitran titiang sane tresna sihin titiang.

Pinih rihin ngiring iraga sareng sami ngaturayang pangayubagia lan suksmaning manah ring Ida Sang Hyang Widhi Wasa duaning asung kerta waranugraha Ida irage sareng sami prasida mapupul iriki kenak lan rahayu ring acara palepasan sisya kelas XII malarapan antuk ngaturang panganjali umat.

OM SWASTYASTU

Bapak/Ibu Guru lan sawitran tiange sane wangiang titiang,

Tan kerasa galahe sampun tigang warsa majalan. Ring rahina sane mangkin titiang lan sawitran titiang sisya kelas XII sampun kawastanin puput ngalaksanayang swadarmaning sisya ring SMA Negeri 1 Tabanan. Riktatkala ngelaksanayang swadarmaning sisya iriki, akeh pisan sane sampun polihang titiang lan sawitran-sawitran titiang. Rasa liang, sebet, manis miwah pakeh sampun kerasayang bareng.

Kerasa engsek ring manah ritatkala iraga sareng sami jagi mapisah nyalanang swadarmaning soang-soang jagi ngerereh pangaweruhan ngelanturang ring jenjang Universitas. Banget pinunas titiang sampunang iraga sareng sami pegat pasawitran pegat penyaman. Mangdane pasawitran lan penyaman sane sampun kabuat tigang warsa ngancan rumaket ngantos kawekasan. Sampunang irage sareng sami lali majeng ring Almamater SMA Negeri 1 Tabanan lan sampunang lali ring Ibu/Bapak Guru sane sampun ngajahin ajah-ajah ngantos iraga uning.

Ritatkala ngerereh pangaweruhan ring jenjang Universitas, ngiring sareng-sareng jemetang pisan mangdane iraga sareng sami dados mahasiswa sane becik lan weruh ring bidang ipun. Tan pewali Almamater SMA Negeri 1 Tabanan ngerasa bangga antuk pabuat iraga jak mekejang. Sampunang pisan iraga sareng sami maparilaksane sane nenten becik lan ten manut sane mawinan Almamater iraga duka.

Bapak/Ibu Guru lan sawitran tiange sane tresnain titiang,

Titiang dados perwakilan sisya kelas XII ngaturang suksma majeng ring Bapak/Ibu sane sampun ngajahin ajah-ajah ngantos titiang sinareng sami uning. Dumogi napi sane kaptiang preasida kapanggihin. Tan lali titiang sinareng sami banget nunas pangampura yening wenten iwang ritakala tigang warsa nuntut ajah-ajah iriki ring SMA Negeri 1 Tabanan.

Sampun puput sambrama wacana titiang dados perwakilan sisya kela XII. Klungkung Semarapura. Yening wenten titiang iwang matur sane tan manut ring kayun titiang banget nunas pangampura duaning tan wenten manusa sane sempurna. Puputang titiang antuk paramashanti.

OM SHANTI. SHANTI, SHANTI OM